Home » Latin America » Pele Oo Ugu Baaqay Neymar Inuu Ku Biiro Barcelona, Iyo Inuusan Ku Mashquulin Timihiisa Iyo Labiskiisa.

Pele Oo Ugu Baaqay Neymar Inuu Ku Biiro Barcelona, Iyo Inuusan Ku Mashquulin Timihiisa Iyo Labiskiisa.

Waxaa Qoray:

Taariikh: 20-February-2013

England v Brazil - International Friendly

Pele ayaa ugu baaqay xiddiga reer Brazil Neymar inuu ka jeesto Manchester City oo uu doorto Barcelona marka uu ugu danbeyn go’aansado inuu ka tago dalkiisa.

Halyeeyga reer Brazil ayaana 21 jirkaan uga digay inuu u dhaqaaqo England, xilli ay shalay soo baxayeen warar la xiriirinaya Manchester City.

“Ciyaarta laga ciyaaro England, Italy iyo Germany waa ay adag tahay sababtoo ah garsoorayaasha inta badan waxay ku ogolaanayaan inaad sii ciyaarto. Barcelona ayaa u fiicnaan laheyd inuu ku biiro.

“Santos ayaa u baahan isaga, taas darteedna ma qabo inuu baxo, laakiin hadiiba uu baxayo waa inuu aado Barcelona.

“Waa ciyaaryahan aad u fiican laakiin malahan qibrad ka baxsan Brazil. Ciyaar kasta oo ku ciyaaro meel ka baxsan Brazil shaqo fiican ma qabto. Qof walba waxa uu qabaa in Neymar uu xalin karo dhibaatada heysata xulka qaranka, laakiin isaga diyaar uma ahan mas’uuliyadaas.

“Kalsooni weyn ayaan ku qabnaa isaga, laakiin durbaba waxa uu boos joogta ah ka helay xulka qaranka.”

Pele ayaa sidoo kale wax ka sheegay hab dhaqanka ciyaaryahanka oo uu ku tilmaamay mid raadinaya in magaciisa uu meel walba gaaro, halkii uu kubada cagta isku bari lahaa dadka.

“Waxaan qabnaa inuu yahay ciyaaryahanka ugu fiican adduunka, laakiin waxa uu inta badan ka walwalaa sida uu uga soo muuqanayo saxaafada halkii uu ka walwali lahaa inuu ciyaaro kooxdiisa.

“Neymar mas’uuliyad badan ayaa dushiisa saaran. Laakiin haatan waxa uu ku mashquulsan yahay fashion iyo timo jarasho.”