Home » Horyaalada » England » Arsenal Oo Qandaraas Cusub Iyo Lacag Uu Suuqa Ku Galo Xagaaga U Soo Bandhigeysa Arsene Wenger.

Arsenal Oo Qandaraas Cusub Iyo Lacag Uu Suuqa Ku Galo Xagaaga U Soo Bandhigeysa Arsene Wenger.

Waxaa Qoray:

Taariikh: 18-February-2013

923770-15321138-640-360

Tababare Arsene Wenger ayaa lagu soo waramayaa in qandaraaskiisa kooxda Arsenal loo kordhin doono islamarkaana lacag xoogan oo uu suuqa kala iibsiga kaga soo adeegto bisha Janaayo faraqa loogu shubi doono, sida ay qorayaan qaar ka mid ah wargeysyada Ingariiska ee maanta soo baxay.

Jariirada The Sun ayaa qoreysa in Arsenal ay ka fekereyso inay sii heysato macalinkeeda ugu guulaha badan Arsene Wenger islamarkaana waxa ay doonayaan inay u soo bandhigaan heshiis labo sanno loogu kordhinayo qandaraaskiisa haatan.

Macalinka Arsenal ayaa qandaraaskiisa haatan uu dhacayaa 2014, waxaana ay madaxda Gunners ka fekerayaan inay sii ceshtaan tababarahooda ugu mudada dheer ilaa 2016, inkastoo ay sii kordhayaan cadaadiska tababaraha uga imaanaya taageerayaasha kuwaasoo doonaya inuu meesha ka baxo.

Dhanka kale sida ay qortay saaka Daily Telegraph, Wenger ayaa waxaa la siin doonaa 70 milyan ginni oo uu suuqa kala iibsiga ku galo xagaaga hadii kooxdiisa ay xaqiijisato booska Champions League iyo hadii kaleba.

Wargeyska ayaa yiri: “Kalsoonida ay kooxda ku qabto Wenger iyo istraatiijiyadiisa waa mid aan la qalqal gelin karin, xitaa hadii ay sannad kale oo koob la’aan ah ku dhameystaan ama ku guuldareystaan inay ku dhameystaan afarta kooxood ee horyaalka ugu sareeya.

“Ku dhawaad 70 milyan ginni ayaa diyaar u ahaan doonta oo uu ku xoojiyo kooxdiisa xagaaga, iyadoo Arsenal ay diirada saareyso seddex ama afar ciyaaryahan, oo uu ku jiro weeraryahan sarre oo buuxiya booskiisa uu baneeyay Van Persie”.

Waxaana wargeyska uu ku sheegay ciyaartoyda diirada u saaran Arsene Wenger inay ku jiraan 24 jirka khadka dhexe ee kooxda Toulouse Etienne Capoue, goolhayaha kooxda Liverpool Pepe Reina, iyo weeraryahanka Fiorentina Stevan Jovetic.

Fekradaada Facebook Ku Dhiibo Ama Qeybta Hoose Ee Fekradaha:

Fekradood ayaa laga bixiyay.