Home » Horyaalada » England » Oscar Oo Guul Ku Hogaamiyay Chelsea, Napoli Oo La Garaacay, Iyo Ajax Iyo Levante Oo Guulo Waa Weyn Gaaray.

Oscar Oo Guul Ku Hogaamiyay Chelsea, Napoli Oo La Garaacay, Iyo Ajax Iyo Levante Oo Guulo Waa Weyn Gaaray.

Waxaa Qoray:

Taariikh: 14-February-2013

article-2278164-1795C83D000005DC-32_634x469

Gool soo daahay oo uu Chelsea u dhaliyay ciyaaryahan Oscar ayaa ku hogaamiyay inay guul muhim ah ka gaaraan kooxda Sparta Prague oo marti ay u ahaayeen iyagoo kaga badiyay 1-0 lugta hore ee wareega 32da ee Europa League.

Ciyaarta oo ku bilaabatay si qabow islamarkaana fursado badan aysan iska helin labada kooxood ayaa waxaa lagu kala maray qeybtii hore barbaro goolal la’aan ah.

Qeybtii labaad ayaa iyadana ku bilaabatay si la mid ah qeybtii hore, iyadoo labada kooxood ay awoodi waayeen inay shabaqa soo taabtaan, ilaa iyo daqiiqadii 82aad markaasoo Chelsea ay heshay goolka guusha.

Oscar ayaa kubada taabsho ah la ciyaaray Hazard ka hor inta uusan kubad ka hoos bixin Vaclik.

Waxaana kooxda heysata Champions League balse ku soo hartay wareega group-yada ay haatan faa’ido u heysataa inay u talaabto wareega 16ka madaama ay heleen guul iyo gool islamarkaana lugta labaad lagu soo booqan doono isbuuca soo socda Stamford Bridge.

Dhanka kooxda caanka ka ah qaarada Yurub ee Ajax ayaa iyadana guul muhim ah ku gaartay garoonkeena ka dib markii ay 2-0 kaga talaabsadeen kooxda Steaua Bucuresti.

Goolal ay qeybtii hore kala dhaliyeen Alderweireld iyo Rhijn ayayna kooxda reer Holland guusha ku raacday, kuwaasoo isha ku haya inay isbuuca danbe xaqiijistaan booskooda wareega 16ka ee Europa League.

Dhanka kale kooxda Napoli ayaa guuldarro lama filaan ay garoonkeeda ku soo gaartay kooxda Viktoria Plzen kuwaasoo hal lug sii gashtay wareega 16ka Europa League ka dib markii ay kaga badiyeen 3-0.

Darida, Rajtoral iyo Tec goolal ay kala dhaliyeen labadii qeyb ee ciyaarta ayayna kooxda Plzen guul caan ah kaga gaartay kooxda horyaalka Serie A ka dhisan ee Napoli.

Dhanka kale kooxda reer Spain ee Levante ayaa hal lug la sii gashay wareega 16ka ee Europa League ka dib markii ay 3-0 kaga takhalustay kooxda ka soo hartay Champions League ee Olympiakos, ciyaar xiiso laheyd oo ku dhexmartay Spain.

Levante ayaana ka faa’ideystay Olympiakos oo 10 ciyaaryahan ku ciyaareysa inta badan ciyaarta, waxaana goolasha u furay Rios, ka hor inta uusan Obefimi Martins rigoore ka qasaarin.

Barkero ayaana u labeeyay ka hor inta uusan Martins gool caadi ah u dhalin kooxda Levante oo guul muhim ah gaartay lugta hore ee wareega 32da Europa League.

Dhinaca kale kooxda Benfica ayaa guul 1-0 ah ka gaartay kooxda Bayer Leverkusen oo marti loo ahaa, taasoo muhim u ah u soo bixitaankooda wareega 16ka ee Europa League.

Kooxda reer Portugal ayaana guushaan muhimka ah waxaa ku hogaamiyay gool uu u dhaliyay Cardozo qeybtii labaad ee ciyaarta.

Kulamada lugta labaad ee wareega 32da waxaa la ciyaari doonaa isbuuca soo socda 21ka Febraayo.

Anji Makhachkala 3 – 1 Hannover
Zenit St. Petersburg 2 – 0 Liverpool
Ajax Amsterdam 2 – 0 Steaua Bucuresti
BATE Borisov 0 – 0 Fenerbahce
Bayer Leverkusen 0 – 1 Benfica
Dynamo Kyiv 1 – 1 Bordeaux
Levante 3 – 0 Olympiakos Piraeus
Napoli 0 – 3 Viktoria Plzen
Sparta Prague 0 – 1 Chelsea

Fekradaada Facebook Ku Dhiibo Ama Qeybta Hoose Ee Fekradaha:

Fekradood ayaa laga bixiyay.